Innhaldet i e-læringskurset har tidlegare vore ein del av Teams-kurset «Kurs for nye legar i kommunen», som Helfo held om lag ein gong i månaden. Med bakgrunn i tilbakemeldingar og erfaringar har delen om blå resept, bidrag og yrkesskade blitt tatt ut av Teams-kurset og erstatta med dette e-læringskurset.
Vi har delt inn e-læringskurset i kortfatta modular, og dei fleste modulane vert avslutta med ei oppgåve. Det tek minimum ein time å ta kurset, og du kan ta det så mange gongar du vil.
– Tilbakemeldingar frå legane er at det framleis er behov for både Teams-kurs og fysiske kurs. Samtidig ønsker vi å legge til rette for at helseaktørane sjølv skal kunne prioritere når dei vil ta kurs frå oss. E-læringskurs er ein effektiv måte å tilby opplæring på, seier Karen Longva Buset, avdelingsdirektør i Helfo veiledning.
Her finn du e-læringskurset
Kurset ligg i læringsplattforma til KS, der Helsedirektoratet og Helfo har sitt eige område: «E-læringskurs om blå resept, bidrag og yrkesskade» (kslaring.no). Lenka tek deg rett til startsida, og du trykker på den grøne knappen oppe til høgre for å kome vidare til kurset. Du treng ikkje å logge deg på nokon plass.
Viss du tek kurset, håpar vi at du tek deg tid til å fylle ut evalueringsskjemaet til slutt. Tilbakemeldingar gjer at vi kan justere på det som ikkje er tydeleg eller verkar som det skal.
Her finn du info om Teams-kurset
Her finn du tidspunkt for Teams-kurset: «Kurs for nye legar i kommunen» (forms.office.com). Dette skjemaet blir i løpet av kort tid oppdatert med datoar for våren 2025.
Dette Teams-kurset består av informasjon om Helfos takstar, i tillegg til at Nav har innlegg om sine takstar og erklæringar.