Gjesteinnbyggaroppgjer for fastlegeordninga

Innbyggarane har høve til å velje fastlege på tvers av kommunegrensene. Det vil seie at ein innbyggar kan ha folkeregistrert adresse i ei kommune og velje fastlege i ei anna kommune. Dette blir kalla ein «gjesteinnbyggar».

Kommunen skal dekke basistilskotet for sine innbyggarar. Dette fører til at det vert eit oppgjer mellom kommunar, som må bereknast og gjerast opp. Dette kallar vi gjesteinnbyggaroppgjer. Helfo har ansvaret for gjennomføringa av dette oppgjeret.

Ved berekning av gjesteinnbyggaroppgjeret for 2023 er det lagt til grunn satsane som er brukt ved berekning av basistilskotet. Som følgje av endra berekningsmåte for basistilskotet, vil ein for fleire kommunar sjå at beløpa i oppgjeret kan avvike samanlikna med tidlegare år.

Før årsskiftet publiserer Helfo både ein totalrapport og ein detaljrapport for året.

Det er tala under «Til og med desember» i detaljrapporten som ligg til grunn for gjesteinnbyggaroppgjeret.

Sjølve oppgjeret vert gjennomført like over nyttår kvart år. Helfo sender då faktura til kommunar som skuldar pengar og utbetalar til kommunar som har pengar til gode.